Согласно Законот за градење во Република Северна Македонија и измените донесени во 2013 година, со членот 4-а од овој Закон, за секоја градба е потребно да се обезбеди позитивно мислење за проектираниот и изведениот степен на механичка отпорност, стабилност и сеизмичка заштита на градбата, од страна на субјект кој врши научноистражувачка дејност – научен институт специјализиран во областа на заштита на градби од сеизмички влијанија. Мислењата за проектиран и изведен степен на механичка отпорност, стабилност и сеизмичка заштита се однесуваат за градби за чија изведба е потребно одобрение за градење.

Мислењето за проектиран степен на механичка отпорност, стабилност и сеизмичка заштита на градбата, (МПС), се однесува на градежно-конструктивниот проект кој е составен дел на основниот проект и се приложува од страна на инвеститорот со барањето за добивање на одобрение за градење. Мислењата за изведен степен на механичка отпорност, стабилност и сеизмичка заштита, во фаза на градба (МИС1) и по завршување на изградбата на носивата конструкција (МИС2), се изготвуваат само за градби за кои е претходно изготвено позитивно МПС и имаат бруто развиена површина поголема од 300м2 (градби наменети за индивидуално домување).

Mислењата се однесуваат на целокупниот процес на проектирање, ревидирање на проектите и изведба на конструкциите на градбите согласно законските прописи во Република Северна Македонија и современите сознанија од областа.